2వ అధ్యాయము

1  పెంతెకొస్తను పండుగదినము వచ్చినప్పుడు అందరు ఒకచోట కూడియుండిరి. 
2  అప్పుడు వేగముగా వీచు బలమైన గాలివంటి యొకధ్వని ఆకాశమునుండి ఆకస్మాత్తుగా కలిగి, వారు కూర్చుండియున్న యిల్లంతయు వ్యాపించెను. 
3  మరియు అగ్నిజ్వాలలవంటి నాలుకలు విభాగింపబడినట్టుగా వారికి కనబడి వారిలో ఒక్కొకనిమీద వ్రాలగా 
4  అందరు పరిశద్ధాత్మతో నిండిన వారై ఆ ఆత్మ వారికి వాక్ఛక్తి అనుగ్రహించినకొలది అన్యభాషలతో మాటలాడసాగిరి. 
5  ఆ కాలమున ఆకాశము క్రిందనుండు ప్రతి జనములోనుండి వచ్చిన భక్తిగల యూదులు యెరూషలేములో కాపురముండిరి. 
6  ఈ శబ్దము కలుగగా జనులు గుంపులుగా కూడివచ్చి, ప్రతి మనుష్యుడు తన తన స్వభాషతో వారు మాటలాడుట విని కలవరపడిరి. 
7  అంతట అందరు విభ్రాంతినొంది ఆశ్చర్యపడి - ఇదిగో మాటలాడుచున్న వీరందరు గలిలైయులు కారా? 
8  మనలో ప్రతివాడు తాను పుట్టిన దేశపుభాషతో వీరు మాటలాడుట మనము వినుచున్నామే; ఇదేమి? 
9  పార్తేయులు మాదీయులు ఏలామీయులు మెసొపొతమియు యూదైయ కపదొకియ పొంతు ఆసియ ప్రుగియ పంపులియ ఐగుప్తు అను దేశములయందలివారు, 
10  కురేనేదగ్గర లిబియ ప్రాంతములయందు కాపురమున్నవారు, రోమానుండి పరవాసులుగా వచ్చియున్న యూదులు, యూదమత ప్రవిష్టులు, 
11  క్రేతీయులు అరబీయులు మొదలైన మనమందరమును వీరు మన భాషలతో దేవుని గొప్పకార్యములను వివరించుట వినుచున్నామని చెప్పుకొనిరి. 
12  అందరు విభ్రాంతినొంది యెటుతోచక ఇదేమగునో అని యొకనితో ఒకడు చెప్పుకొనిరి. 
13  కొందరైతే - వీరు క్రొత్త మద్యముతో నిండియున్నారని అపహాస్యము చేసిరి. 
14  అయితే పేతురు ఆ పదునొకరితోకూడ లేచి నిలిచి బిగ్గరగా వారితో ఇట్లనెను - యూదైయ మనుష్యులారా, యెరూషలేములో కాపురమున్న సమస్త జనులార, యిది మీకు తెలియుగాక, చెవియొగ్గి నా మాటలు వినుడి. 
15  మీరు ఊహించునట్టు వీరు మత్తులుకారు, ప్రొద్దుపొడిచి జామయిన కాలేదు. 
16  యోవేలు ప్రవక్తద్వారా చెప్పబడిన సంగతి యిదే, ఏమనగా 
17  - అంత్యదినములయందు నేను మనుష్యులందరిమీద నా ఆత్మను కుమ్మరించెదను మీ కుమారులును మీ కుమమారైలును ప్రవచించెదరు మీ యౌవనులకు దర్శనములు కలుగును మీ వృద్ధులు కలలు కందురు, 
18  ఆ దినములలో నా దాసులమీదను నా దాసురాండ్లమీదను నా ఆత్మను కుమ్మరించెదను గనుక వారు ప్రవంచించెదరు 
19  పైన ఆకాశమందు మహత్కార్యములను క్రింద భూమిమీద సూచకక్రియలను రక్తమును అగ్నిని పొగ ఆవిరిని కలుగజేసెదను. 
20  ప్రభువు ప్రత్యక్షమగు ఆ మహాదినము రాకమునుపు సూర్యుడు చీకటిగను చంద్రుడు రక్తముగాను మారుదురు, 
21  అప్పుడు ప్రభువు నామమునుబట్టి ప్రార్థనచేయువారందరును రక్షణపొందుదురు1 అని దేవుడు చెప్పుచున్నాడు. 
22  ఇశ్రాయేలువారలారా, యీ మాటలు వినుడి దేవుడు నజరేయుడగు యేసుచేత అద్భుతములను మహత్కార్యములను సూచకక్రియలను మీ మధ్యను చేయించి, ఆయనను తనవలన మెప్పుపొందినవానిగా మీకు కనుపరచెను; ఇది మీరే యెరుగుదురు. 
23  దేవుడు నిశ్చయించిన సంకల్పమును ఆయన భవిష్యద్ జ్ఞానమును అనుసరించి అప్పగింపబడిన యీయనను మీరు దుష్టులచేతసిలువవేయించి చంపితిరి. 
24  మరణము ఆయనను బంధించియుండుట అసాధ్యము గనుక దేవుడు మరణవేదనలు నివారణచేసి ఆయనను లేపెను 
25  ఆయననుగూర్చి దావీదు ఇట్లనెను- నేనెల్లప్పుడు నా యెదుట ప్రభువును చూచుచుంటిని ఆయన నాకుడిపార్శ్వముననున్నాడు గనుక నేను కదల్చబడను. 
26  కావున నా హృదయము ఉల్లసించెను; నా నాలుక ఆనందించెను మరియు నా శరీరము కూడ నిరీక్షణ కలిగి నిలకడగా ఉండును. 
27  నీవు నా ఆత్మను పాతాళములో విడిచిపెట్టవు నీ పరిశుద్ధుని కుళ్లుపట్టనియ్యవు. 
28  నాకు జీవమార్గములు తెలిపితివి నీదర్శన మనుగ్రహించి నన్ను ఉల్లాసముతో నింపెదవు. 3
29  సహోదరులారా, మూలపురుషుడగు దావీదును గూర్చి మీతో నేను ధారాళముగ మాటలాడవచ్చును. అతడు చనిపోయి సమాధి చేయబడెను; అతని గోరీనేటివరకు మనమధ్య ఉన్నది. 
30  అతడు ప్రవక్తయై యుండెను గనుక - అతని గర్భఫలములోనుండి అతని సింహాసనము మీద ఒకని కూర్చుండబెట్టుదును అనిదేవుడు తనతో ప్రమాణపూర్వకముగా ఒట్టు పెట్టుకొనిన సంగతి అతడెరిగి 
31  క్రీస్తుపాతాళములో విడువబడలేదనియు, ఆయన శరీరము కుళ్లిపోలేదనియు దావీదు ముందుగా తెలిసికొని ఆయన పునరుత్థానమునుగూర్చి చెప్పెను. 
32  ఈ యేసును దేవుడు లేపెను; దీనికిమేమందరము సాక్షులము. 
33  కాగా ఆయన దేవుని కుడిపార్శ్వమునకు హెచ్చింపబడి, పరిశుద్ధాత్మను గూర్చిన వాగ్దానమును తండ్రివలన పొంది, మీరు చూచుచు వినుచునున్న దీని కుమ్మరించియున్నాడు. 
34  దావీదు పరలోకమునకు ఎక్కిపోలేదు; అయితే అతడిట్లనెను - 
35  నేను నీ శత్రువులను నీ పాదములక్రింద పాదపీఠముగా ఉంచుపర్యంతము నీవు నా కుడిపార్శ్వమున కూర్చుండుమని ప్రభువు నా ప్రభువుతో చెప్పెను. 4
36  మీరు సిలువవేసిన యీ యేసునే దేవుడు ప్రభువు గాను క్రీస్తుగాను నియమించెను. ఇది ఇశ్రాయేలు వంశమంతయు రూఢిగా తెలిసికొనవలెనని చెప్పెను. 
37  వారు ఈ మాట విని హృదయములో నొచ్చుకొని- సహోదరులారా, మేమేమి చేతుమని పేతురును కడమ అపొస్తలులను అడుగగా 
38  పేతురు - మీర మారుమనస్సుపొంది, పాపక్షమాపణ నిమిత్తము ప్రతివాడు యేసుక్రీస్తు నామమున బాప్తిస్మము పొందుడి; అప్పుడు మీరు పరిశుద్ధాత్మ అను వరము పొందుదురు. 
39  ఈ వాగ్దానము మీకును మీ పిల్లలకును దూరస్థులందరికిని, అనగా ప్రభువైన మన దేవుడు తనయొద్దకు పిలిచిన వారికందరికిని చెందునని వారితో చెప్పెను. 
40  మరియు ఇంక అనేకవిధములైన మాటలతో సాక్ష్యమిచ్చి - మీరు మూర్ఖులగుఈ తరము వారికి వేరై రక్షణ పొందుడని వారిని హెచ్చరించెను. 
41  కాబట్టి అతని వాక్యము అంగీకరించినవారు బాప్తిస్మము పొందిరి; ఆ దినమందు ఇంచుమించు మూడు వేలమంది చేర్చబడిరి. 
42  వీరు అపొస్తలుల బోధయందును, సహవాసమందును, రొట్టె విరుచుటయందును, ప్రార్థన చేయుటయందును ఎడతెగక యుండిరి. 
43  అప్పుడు ప్రతివానికిని భయము కలిగెను. మరియు అనేక మహత్కార్యములును సూచకక్రియలును అపొస్తలుల ద్వారా జరిగెను. 
44  విశ్వసించినవారందరు ఏకముగా కూడి తమకు కలిగినదంతయు సమష్టిగా ఉంచుకొనిరి. 
45  ఇదియుగాక వారు తమ చరస్థిరాస్తులను అమ్మి, అందరికిని వారి వారి అక్కరకొలది పంచిపెట్టిరి. 
46  మరియు వారేకమనస్కులై ప్రతిదినము దేవాలయములో తప్పక కూడుకొనుచు, ఇంటింటరొట్టె విరుచుచు, దేవుని స్తుతించుచు, ప్రజలందరివలన దయపొందినవారై 
47  ఆనందముతోను నిష్కపటమైన హృదయముతోను ఆహారము పుచ్చుకొనుచుండిరి. మరియు ప్రభువు రక్షణ పొందుచున్నవారిని అనుదినము చేర్చుచుండెను. 
Download Audio File